Home

Auw Prins Wim Claessen geridderd in de orde van de Pappegey

03.01.2009
Os gewaardeierd lid Wim Claessen is veur al zien verdeinste aafgeloupe zaoterdig oetgeroupe pes Ridder in de orde van de Pappegey. Veer filleseteiere haom mit zien ongersjeiing en zeen d'r greutsj op de ridder van 2009 in os midde te hobbe.

Vogelsjeite 2008

07.09.2008
Mit ein taamelik hoog beiergehalte van de veurgaonde aovend woort op zondig jeederein om 11 oer verwach biej 't ontbeit van ooze keizer. Op ein vertrouwde lokaase woort os sjpek mit ei veurgesjooteld om eine sjteevige baom te legge veur de res van d'n daag.
Nao 't aafnumme van 't defile en aansjleitend de optoch (euverigens zonger läöker of stil te sjtaon) koosjte v'r in de tweede runj beginne mit 't sjeite. Nao eine heftige mèr eerlikks sjtried bleek Wim Claessens 't sjerpst aafgesjteld te sjtaon. Marot Jo Willems bleek aevel nog ein tendje sjerper te sjtaon en sjoot zich pès keizer van 't Alternatief Sjöttefees 2008.
Wim os fillestaases! V'r sjpichte òs al op 't sjèk mit ei volgend jaor.

Belsje aovend

06.09.2008
Nao 33 jaor höbbe veer es Auw Prinse dan enjteliks ens 't sjottemaol maoge organizeiere. Nao vööl gereegel höbbe veer eine richtige belsje aovend inein weite te sjteevele mit de neudige belsje artiste. Veer haope in jeeder geval dat geer uch gout geammezeierd höb en dat v'r neit weier 33 jaor houve te wachte...

Trouwdaag Cyriel I & Pauline

05.09.2008
Vriedig vief september is òs lid Cyriel Niël mit zien Pauline getrouwd. Wie 't zich de Auw Prinse betaamp woorte zien vanoet de kirk opgehaold om saame mit os eun rundje door de sjtad te vaare. Naames alle leede wunsje veer uch vööl gelök saame.

Auw Prinse Reiske 2008 (Gent)

07.06.2008 / 08.06.2008
Aafgeloupe 7 & 8 juni is 't tradisjoneele Auw Prinse waekenj gewaes. Nao eesj de broewerie van De Koninck in Antwerpe te höbbe bezoch, zeen veer aafgereis nao òs eindbesjtömming Gent. Hiej kreege veer wie geweunlik ein rondjleiding door de sjtad mit ein bezuike aan 't auwdste kefeeke van Gent.
's Angerdaags eine aangename rondvaart in ein beutje en de trökreis richting Zitterd mit eine tössje-sjtop in Antwerpe, wo veer veur de derde maol koosjte keuze oet kip of zalm. 't Haet in jeeder geval gesjmaak. Tot sjlot nog ein pötje paintballe en es aafsjleiting 't aovend aete oppe mert.

Al mit al weier ein feijn reiske, komplemente aan de reiskemisse. (Oet veiligheids euverwaeginge veur òs leede waere de foto's eesj sjtreng gesillekteierd veurdat zie hiej versjiene)

Hauf haane feeske Joep VIII

11.05.2008
Pènkster zondig 11 mei haet ozze nuuje praeses de wieze laeftied bereik van 40 jaor. Nao 't aanbeije van 't kedoo höbbe v'r òs dan ouch in "kefee Wijnands", wie geweun d'r 1 of 2- en twintig gedronke. Joep, fien feeske, v'r höbbe òs de hauf haane laote sjmaake. Van harte gefilleseteierd. Bekiek hiej de foto's.

Nuuje website

01.05.2008
't Haet lang gedoerd, mer 't is dan toch einteliks zo wiet. De vernuujde website van de auw prinse is online!

Op deeze website venjt geer alles euver òs vereiniging, akiviteite, foto's en neit te vergaete de teks van òs eige Auw Prinse Leidje. Veer wunsje uch vööl plezeier op ozze sait en haope uch sjnel weier te zeen.

Komplemente,
Auw Prinse Zitterd

Foto: R. Sprengers