Thoes  Wilkòm oppe Auw Prinse saitOp dees sait zult geer veurnamelik nutteloze informaase venje euver de Auw Prinse van Zitterd en hun aktiviteite. Dat kan oeteinloupe van ein reisversjlaag, ein naat oug, ein keizesjfees pès ein troewerie. Wiejer vendj geer hiej eesjdaags auch anger informaase euver de leede van de einige vereiniging in Zitterd wovan nuuj leede neit door de anger leede waere gekaoze, en woveur me zich auch neit kan aanmelje es lid.
Brandj in Hasselt 10.09.2011 en 11.09.2011 In 2011 tooge de Auw Prinse mit 't jäörliks reiske nao zöstersjtad Hasselt, bekend van de Belsje sjnaps (wittekes) en zichzelf ei bietje Hollès-sjtuuterig aanpriezend es Houfsjtad van de Sjmaak. Aangezeen sjriever deezes zo versjtenjig is gewaes òm neit mit te gaon zal dit jaor gein betroebaar versjlaag oppe sait van de Auw Prinse te laeze zeen. Mèr geluif geras de verhaole, al lieke ze nog zo sjterk. Toch mòt 't dit jaor ein k..k..k..saai reis zeen gewaes. Òm ei bietje laeve in de broewerie (hauwe de Auw Prinse nog nooits gezeen) te brènge meinde me ein poging te mòtte waage òm 't Ibis-hotel in Hasselt in brandj te sjtaeke. Gelökkig waar dao neit vööl dat koosj brenne. De boottoch veil dit jaor sjwaor taenge: dao moosj gepeddeld waere. Dao kreeg me hònger en doosj van, dus de reiskemisse hauw get te aete en te drenke geregeld. Daonao nog eine euversjtaek mit ´t vaer biej Sjtokkem en vervolges op hoes aan, woo dit jaor weijer minder vrouwluuj òp ôs club sjtònge te wachte. Bekiek de foto's.
Bart Janssen keuning 04.09.2011 Op zòndig 4 september 2011 vònj ein felle sjtried plaatsj veur 't keuningssjap van de Auw Prinse. Wae zou Joep opvolge? Dat zou eine sjerpe sjöt mòtte zeen dae zien kroet nog neit versjaote hauw. Wae zou dat mòtte waere? 't Woort Bart Janssen. Neit zo gek, de pap van hööm is waal zeeve keere keuning van de Auw Prinse gewaes, mèr nooits keizer: biej 't eindjkavele veile hööm ummer sjpontaan de ouge toe, woodoor hae gein böl zoug en ummer d'rnaeve sjoot. Van Bart, dae waal mit ein waope waeg wit, hauwe veer dan ouch hoger verwachtinge. Hae haet ze helaas neit waor kenne maake, went Leo Kretzers van Koosj Baeter koosj neit baeter: dae sjoot de vogel aaf en woort keizer. Bekiek de foto's.
Eesjte Groote Zittesje Keizesjreünie03.09.2011 Op zaoterdig 3 september 2011 vònj ter eere van 't keizessjap van Joep en van keizer Joep zelf in de sjpeigeltent oppe Cour Solanus 't tradisjioneel keizesjfees plaatsj. Ònger d'n tittel 'Eesjte Groote Zittesje Keizesjreünie' woort, nao ein gezellige resepse, door de eige en get ingehuurde artiste (dansgròp Spirit oet Ech, de Desperado's, Ivo Salden mit akkordejon en tenor Peter Schurkens) ein sjtökske variejetee à la Groosse Noemer gebaoë, mit aaf en toe get graof koeve. De gelaegenheidskapel van de Auw Prinse mòch zich laote heure. Mèr de Big Band Beeg o.l.v. Alex Loiacono waar toch waal biezunjer gout!. Bekiek de foto's.
Getrouwd, op zien boerefluitjes 20.08.2011 Op zaoterdig 20 augustus 2011 zeen ex-prins Ruud (I) Meuwissen en zien vlèmke Audrey - dat ziene achternaam gein eer aan deit - eesj op 't sjtadhoes en daonao in de kirk mit ein getrouwd. Dits keer woort 't broedspaar netjes in 't zunke gezat, en neit mit sjpregitse die sjtöp deige opweije. Keurig gedraag van ein klup die hun eige leede neit deit keize sjient dus ouch muigelik te zeen. In de sjtiel van de auw ambachte van Einekoeze - woo biej de pap en de mam van Ruud toes 't fees woort gehauwte - woort 't broedspaar door de sjtad gevaare. Veer wunsje auch hun ein goud en langk en gelökkig laeve saame (al klink dat oet de mondj van ummer meer auw prinse neit mee zo aannummelik). Veer höbbe ein paar foto's van 't frisj broedspaar. Es geer d'rs ouch höb, sjik ze aan ôs op, dan plaatsje veer die oppe sait. Bekiek de foto's.
Neit veur de kirk? Dan mer VEUR de kirk!02.07.2011 Op zaoterdig 2 juli 2011 zeen ex-prins Paul (I) Ruigt en Anne Weijman door burgemeister Sjraar Cox in 't Mariapark mit ein in de ech verbònje. Wie veer, de Auw Prinse, de oetneudiging veur de troewerie ens goud hauwe gelaeze, herlaeze en nog ens gelaeze woort toch ech duudelik dat veer geine erehaag veur 't broedspaar aan ein of anger kirkepaort houfden te arransjeiere. Paul en Anne zouwe neit veur de kirk trouwe. Neit veur de kirk trouwe? Dan maar VEUR de kirk! Dat woort door zien vrunj bie de Auw Prinse al sjnel es passend thema gevònje om Paul en Anne eine richtig onvergaetelikke troewerie te bezörge. Veer wunsje hun ein goud en langk en gelökkig laeve saame. Bekiek de foto's.
Zomeraktiviteit neit veur 'sjiethoezer'26.06.2011 De kemisse die waar belas mit de organesaase van de zomeraktiviteit haet dit jaor midde in de roos gesjaote. Biej I-VY Outside kreeg jederein de gelaegenheid 't beste oet zichzellef te haole, zien angste te euverwinne, of angesj mit te loupe in eine GPS-sjpeurtoch. Es auch dat te geveerlik woort gevònje koosj me zich aan ein lang taofel zette en eine pint drenke, of ein IESKE aete (Wil, bedank, auch veur 't ies). En wiej me later muig en content van de geleverde prestaases honger wiej ei paerd hauw gekreege hauw de kemisse dao auch aan gedach en veur eine BBKjoe gezörg. Auch ôs poete höbbe zich neit vervaeld. 't Waar leuk te zeen wie zie mit geweldige sjpas alle klumaktiviteite höbbe belaef. Zie deige die auwe nog get veur, wiej geer kent zeen op de dae daag genòmme fotoos. Bekiek de foto's.
Naat Oug veur Wim Claessens 17.04.2011 Oppe jaorvergadering van 17 april 2011 kreeg Wim Claessens 't Naat Oug oetgereik: 4x11 jaor auw prins en hae zuut ’t nog ummer zitte. Ein Naat Oug is ein òngersjeijing die get zaet euver de persoon dae ze krig. Biej Wim waar dat - behauve eine sjerpe blik - ein gezet en ein geheve wiesvingerke... Veer haope dat Wim dees òngersjeijing nog heel lang zal draage. Euveriges wurd 't Naat Oug door Auw Prins Jan Dewever bedach, òntworpe en gemaak, en is 't gans toegesjpits op de karakter- en anger eigesjappe van de bedoelde draeger, gezeen door de dreug ouge van Jan. Mee hiejeuver haope veer uch euver neit al te lange tied hiej oet de duik te kenne doon.
Auw Prins Joep Wijnands geridderd in de orde van de Pappegey08.01.2011 Oppe oetruipingszitting van 2011 gouf Vors Harie I aan dat 't hööm hauw behaag - zo zaet me dat - Joep Wijnands, praeses van de Auw Prinse Zitterd, te benuime pes Ridder in de Orde van de Pappegey. Dit, òmdat Joep heel vööl wirk haet verzat in 't belang van de Zittesje Vastelaovend. 't Wurd ein indrökwekkende erelies: Prins gewaes, Marot gewaes, Keuning, Keizer en noe auch nog Ridder. Vööl meer kan dat neit waere! Alla, senator dan nog, missjiens. Joep, names alle Auw Prinse van harte gefilleseteierd mit dees òngersjeijing. Es doe nòg zakduikskes neudig höbs heure veer dat waal.
Alweier eine keizer: Joep Wijnands12.09.2010 't Doerde 3x11 jaor veurdat de Auw Prinse in 2007 entjeliks eine sjöttekeizer kreege. Dees lien doortrekkend zouë veer dan pas weier in 2040 aan de beurt zeen veur eine opvolger van d'n illustere eesjte sjöttekeizer van de Auw Prinse: Hub Hamers. Gelökkig haet 't neit zo lang gedoerd: in 2010 sjoot Auw Prins Joep weier èns de vogel aaf en auch nog twee keer eine van piepsjoem. Nao 't aafsjeite van de tweede vogel van piepsjoem sjoot hae zelf auch vol en bedankde hae alle aanwezige sjötte mit eine geweldige toesjpraok, frisj van de laever en rech oet 't hart.
Reiske 2010 (Aoke) 4 en 5 juli 2010 Dit jaor waar de reis georganiseierd door ein katsj reiskemissie. Die hauw ôs wies gemaak dat de reis dit jaor baeter, leuker en minder duur zou waere es die drie '...'-reize die de veurige kemissie inein hauw gedreejd. Helaas is dat neit gans gelök. Dao 'onze jongens' - nee Sjannie, daarmee bedoelen wij niet onszelf - bès waal aardig aan 't voetballe waare oppe WK, en dao de reiskemisse dat goud hauw veurvuild, sjtòng bekans gans 't waekeindj in 't teike van voetballe. 't Begoosj mit ein sjienbewaeging: me perbeierde ôs wies te maake dat veer dit jaor op reis ginge nao Zitterd Zuid. Zelfs burgemeister Sjraar Cox trapde dao in, bliej es hae waar dat hae die van Gelaen noe entjeliks èns duudelik koosj maake dat die van Zitterd zich neit te goud vuile auch èns ein bezuik aan ein minder gouw buurt te brenge. Reiskemissie: zo wurd ein reis dus waal gouwekouper, mèr neit leuker. Waal mòt gezag waere dat hienao 't pregram neit mee kapot koosj. Nao ein pötje golfvoetbal in Zöstere brach de bös ôs nao Aoke. Leuk om te weite dat 't Tivoli-stadion van Alemannia Aoke is geboewd mit 't konsèp van ôs eige Fortuna-stadion in gedachte: zoget nooits! Alle pruuse in Aoke waare raadgek, want die Mannschaft hauw gesiegt, sjus wie 'onze jongens'. 't Waar saoves dan auch goud toeve dao in Aoke. Midde in de nach trökloupend nao 't hotel bleek dat veer neit zowiet hauwe houve loupe, de Antoniusstraße bleek um die Ecke gelaege te zeen. De zòndigmörge höbbe veer ôs oppe Mert in Aoke mèr op ein terras gezat, want de kemissie hauw gein böl georganiseierd veur 't mörgesprogram. Mit ein gouw reiskemissie zouë veer dan get kultureels zeen gaon doon, of ein interessante ròndjleiding kriege... De barbeque aan de kartbaan in Vaolsj maakde d'n daag weier goud. 't Waar heit dae daag. Toch kreege veer die drie vaater beier mit ôs drie-en-dertige neit oet... Reiskemissie: vööl is neit ummer baeter! Pes zowiet höb geer neit geleerd van die paar foute van de auw reiskemissie. Trök oppe Mert in Zitterd sjtònge ôs daames dan auch weier òp ôs te wachte. De foto's höbbe veer gewis. 't Waar euveriges weier ein erg leuke reis.
Reiske 2009 (Leiden) 3 en 4 juli 2009 Dit jaor ging de reis nao sjleutelsjtad Leiden, naodat veer eesj mit gevaor veur eige en anger laeves op Solexmotoore door ei Brabants dörp höbbe geraos. Leiden is ein leuke sjtad, wo ummer get loos is, sjus wie in Zitterd. Gezaete op ein terras vrouge veer ôs aaf wo al die plisse noe veur neudig waare. Wie veer aeve later d'n houk omsjlouge òm irges get te aete bleek dat in ein anger kefee eemes taenge eige wil 't daaglikse veur 't eeuwige hauw verruuld. Wiejer waar 't erg gezellig. Auch Koen vuilde zich tössje die sjtudente gans thoes en leit zien emoosies de vrieje luip. Paul höbbe veer oppe tied laote inzeen dat 't neit versjtenjig is òm mit grote jònges ruzie te maake euver Feijenoord en die twee die 't sjnachs de waeg nao 't hotel aan eine meneer oet noordelijk Afrika doosjten te vraoge zeen toch nog gans thoes gekòmme. 's Angerendaags aeve sjporte aan zee. Dao höbbe veer eine op 't sjtrandj aangesjpuilde witte walvösj trök de zee in geduujd. Dae koum aevel geliek weier trök 't sjtrandj op, dus höbbe veer hööm mer mit heivesj genòmme. Oppe trökreis nog ein auwerwets koud buffet gehad, geer wit waal, mit van die glaasaspersjes in gekaokde sjenk geròld. De kastelein van die tent is noe nòg aan 't raekene wievööl wins hae dat jaor hauw kènne maake es hae geine 'all in'-pries hauw aafgesjpraoke mit ôs geweldige reiskemissie. Veer gaon dao zeker nog èns trök. Trök in Zitterd koum ein endj aan ein harmonieus waekeindj. Ôs daames sjtònge ôs al op te wachte. Foto's van dees reis zeen neit gesjik veur publikasie. 't Waar euveriges weier ein erg leuke reis.
Auw Prins Wim Claessen geridderd in de orde van de Pappegey03.01.2009 Ôs gewaardeierd lid Wim Claessen is veur al zien verdeinste veur de Zittesje Vastelaovend oetgeroupe pes Ridder in de orde van de Pappegey. Veer filleseteiere häöm mit zien ongersjeiing en zeen d'r greutsj op de ridder van 2009 in ôs midde te höbbe.
Vogelsjeite 200807.09.2008 Mit ein taamelik hoog promillaasj van de veurgaonde aovend nog in de prie woort op zòndig jeederein om 11 oer verwach biej 't ontbeit van ooze keizer. Op ein vertroewde lokaase woort ôs sjpek mit ei veurgesjooteld om eine sjteevige baom te legge veur de res van d'n daag. Nao 't aafnumme van 't défilé en aansjleitend den optoch (euverigens zònger läöker of stil te sjtaon) koosjte vee'r in de tweede runj beginne mit 't sjeite. Nao eine heftige mèr eerlikks sjtried bleek Wim Claessens 't sjerpst aafgesjteld te sjtaon. Marot Jo Willems bleek aevel nog ein tendje sjerper te sjtaon en sjoot zich pès keizer van 't Alternatief Sjöttefees 2008. Wim os fillestaases! Veer sjpichte òs al op 't sjpek mit ei kòmmend jaor.
Belsje aovend06.09.2008 Nao 33 jaor höbbe veer es Auw Prinse dan enjteliks èns 't sjöttemaol maoge organizeiere. Nao vööl gereegel höbbe veer eine richtige Belsje Aovend inein weite te sjteevele mit de neudige Belsje tòb-artiste. Veer haope in jeeder geval dat geer uch gout geammezeierd höb en dat veer neit weier 33 jaor houve te wachte... Trouwdaag Cyriel I & Pauline05.09.2008 Vriedig vief september is ôs lid Cyriel Niël mit zien Pauline getrouwd. Wie 't zich de Auw Prinse betaamp woorte zien vanoet de kirk opgehaold òm saame mit ôs ein rundje door de sjtad te vaare. Naames alle leede wunsje veer uch vööl gelök saame. Reiske 2008 (Gent)07.06.2008 - 08.06.2008 Aafgeloupe 7 & 8 juni is 't tradisjoneele Auw Prinse waekènj gewaes. Nao eesj de broewerie van De Koninck in Antwerpe te höbbe bezoch, zeen veer aafgereis nao ôs eindbesjtömming Gent. Hiej kreege veer wie geweunlik ein ròndjleiding door de sjtad mit ein bezuik aan 't auwdste kefeeke van Gent. Daonao höbbe veer de meiste angere kefees auch nog bezoch. 't Woort erg laat. De luuj die aan de sjtraotkantj van 't hotel sjleipe zouge 't sjmörgesvruig, wiej ze de gerdiene aopesjlouge, dat eemes ziene pizza veur de deur van 't hotel op sjtraot hauw laote liGGe. Doodzunj! Ron is 't neit gewaes, want dae hauw sjwarma gegaete. Nao de mörgeskaffe kreege veer eine aangename ròndjvaart in ein beutje mit ein zeer sjarmante sjtuurvrouw, die erg taenge dae gròp Hollènjes hauw opgezeen, mer al sjnel gerösgesjteld koosj waere. De trökreis richting Zitterd verleip mit eine tössje-sjtop in Antwerpe, wo veer veur de driede keer koosjte keize oet houn of zalm. 't Haet in jeeder geval gesjmaak. Es letste aktiviteit nog ein pötje paintballe en es aafsjloeting 't aovend aete oppe mert. Al mit al weier ein feijn reiske, komplemente aan de reiskemisse. (Oet veiligheidseuverwaeginge veur òs leede waere de foto's eesj sjtreng gesillekteierd veurdat zie hiej versjiene.)
Hauf haane feeske Joep VIII11.05.2008 Pènkster zondig 11 mei haet ozze nuuje praeses de wieze laeftied bereik van 40 jaor. Nao 't aanbeije van 't kedoo höbbe veer ôs dan ouch in 'kefee Wijnands', wie geweun d'r ein- of twee-en-twintig gedrònke. Joep, fien feeske, veer höbbe ôs de hauf haane laote sjmaake. Van harte gefilleseteierd.
Nuuje website01.05.2008 't Haet lang gedoerd, mer 't is dan toch einteliks zo wiet. De vernuujde website van de auw prinse is online! Op deeze website venjt geer besjlis neit alles euver ôs vereiniging, alle akiviteite, alle foto's mèr waal de kòmplete teks van ôs eige Auw Prinse Leidje. Veer wunsje uch vööl plezeier op ôzze seit en haope uch sjnel weier te zeen. Komplemente, Auw Prinse Zitterd |
||||
| Development & Design: Ermeco | Copyright Auw Prinse Zitterd © 2008 |
Reiske 2011 
